Nakuha ng Adamson University ang huling upuan sa UAAP Season 87 men’s basketball Final Four.

 Ito’y matapos nilang dominahin ang University of the East, 68-55, Miyerkoles sa Mall of Asia Arena.

Makakaharap ng Adamson ang defending champion De La Salle University sa semifinals sa Sabado.

Makakatapat naman ng University of Santo Tomas ang no. 2 team University of the Philippines.

Angat ng 15 ang Soaring Falcons, 58-43, 6:33 minutes pa sa final frame nang kumana ng 5-0 run ang Red Warriors.

Ngunit agad napawi ang pag-asa ng UE nang ma-foul out si Precious Momowei matapos ang mid-air collision nila ni Monty Montebon.

Humirit pa ng tres si Jack Cruz-Dumont ng UE subalit gumanti rin ng three-pointer si Montebon upang selyuhan ang panalo ng Soaring Falcons.

Nagposte si Cedrick Manzano ng 17 points, 10 rebounds, four assits, two steals at two blocks, habang si Montebon ay may 13 points, six assists, three rebounds at block para sa Adamson.

Si Cruz-Dumont naman ang nanguna sa UE sa kanyang 15 points, habang si Rainer Maga ay may 10 points.

Samantala si Momowei ay may double-double 11 rebounds at 10 points bago na-foul out. (Litrato mula sa The UAAP Facebook Page)