Nagtutulungan sina Senador Alan Peter at Pia Cayetano para maitatag ang Virology Institute of the Philippines (VIP), isang ahensya na tututok sa pag-aaral ng mga virus at paggawa ng mga bakuna.

Itinulak ito ng magkapatid na senador sa pamamagitan ng Senate Bill No. 2893 sa ilalim ng Committee Report No. 196, na naglalayong magtatag ng VIP bilang tugon sa lumalaking banta ng mga pathogen at mga agent na nagdudulot ng sakit na nakakaapekto sa mga tao, hayop, at halaman.

Sa pagtalakay sa kahalagahan ng panukala sa plenary session nitong December 9, 2024, binigyang-diin ni Senador Pia Cayetano na ang paglikha ng VIP ay makatutulong at susuporta sa Research Institute for Tropical Medicine (RITM) at magpapalakas sa pananaliksik at pagpapaunlad ng bansa sa mga sakit na viral.

“The goal was to create a well-considered and strategic bill – not a reactionary measure driven by panic but one that effectively addresses the country’s needs without wasting our limited resources,” wika niya.

Kasalukuyang pinangangasiwaan ng RITM ang mga programa sa pananaliksik na nakatuon sa mga nakakahawa at tropikal na mga sakit. Kapag naitatag na, palalawakin ng VIP ang kapasidad ng bansa na pag-aralan ang mga umuusbong at umuulit na viral disease at bumuo ng mga bakuna.

Pinasimulan naman ni Senador Alan Peter Cayetano, bilang chairman ng Senate Science and Technology Committee, ang public hearing sa panukala noong April 2024 kung saan binigyang diin niya ang kahalagahan ng pagtugon sa mga hamon sa kalusugan at ekonomiya.

“The entire government must, and will, act quickly to address the public health and economic crisis that threatens the lives and livelihood of our kababayan,” wika niya.