Isinumite na ng Land Transportation Franchising and Regulatory Board (LTFRB) sa Department of Transportation (DOTr) ang kanilang rekomendasyon kaugnay ng mga petisyon para sa dagdag-pamasahe, na inihain ng iba’t ibang transport groups.
Kinumpirma ni LTFRB Chairman Vigor Mendoza II na tapos na ang pagsusuri ng ahensya sa mga kahilingan mula sa traditional at modern jeepneys, city at provincial buses, point-to-point buses, airport taxis, at transport network vehicle services. Nasa kamay na ngayon ni Transport Secretary Giovanni Lopez ang pagpapasya.
Ayon kay Mendoza, hindi inaasahang malaking pagtaas ang mangyayari sa pamasahe ng jeep. Ang posibleng adjustment ay nakabatay lamang sa paggalaw ng presyo ng diesel mula noong huling provisional increase halos dalawang taon na ang nakalipas.
“It is not too high, even if it will be raised,” paliwanag ni Mendoza, na nagsabing nasa humigit-kumulang P7 ang nai-compute na pagtaas batay sa fuel cost differences.
Hiniling ng jeepney groups sa Metro Manila na itaas ang minimum fare mula P13 hanggang P14 para sa traditional units, at mula P15 hanggang P16 para sa modern jeepneys. Samantala, inihain din ng mga bus operators ang kanilang mga petisyon para sa adjustment ng base fare at succeeding kilometer charges.
Inaasahang maglalabas ng final decision ang DOTr sa December 1.
Sa kanilang pahayag, binigyang-diin ng LTFRB na ang rekomendasyon ay ginawa batay sa balanseng konsiderasyon: ang kakayahan ng commuters, ang kabuhayan ng drivers at operators, at ang pangkalahatang kondisyon ng ekonomiya.
